Воопшто не треба во овој исклучително важен процес да се служиме со манипулации. Во моментот не може да се репреговара преговарачката рамка и тоа е само замајување на јавноста и подобрување на своите лични позиции, изјави потпретседателот на СДСМ, Перо Костадинов во дебатата со Дафина Стојаноска од ВМРО-ДПМНЕ во „24 отворено“ на ТВ24.
Тој додаде дека Македонија дојде до еден момент на патот кон ЕУ во кој беше внатрешно блокирана, самата од себе.
Во интерес на дијалогот и новата политичка култура што треба да ја создаваме, не би се навраќал наназад, кога ВМРО-ДПМНЕ не сакаше јасно да учествува во целиот процес и пред францускиот предлог, рече Костадинов.
Потпретседателот на СДСМ истакна дека не треба од сите теми да правиме фаталност и да губиме години без да ги завршиме интегративните процеси.
Македонија имаше историски шанси и претходно да биде понапред во овие интегративни процеси и многу работи можеа порано да бидат завршени, ако како општество бевме сложни за стратешките цели на државата. Години и години претходно ВМРО-ДПМНЕ имаше можност да направи поместување во евроинтегративните процеси и во процесите што значат и меѓународен и внатрешен успех, рече Костадинов.
Тој додаде дека темите за стратешките цели и интереси на државата не треба да се користат за дневнополитички поени и треба да се покаже едно ново ниво на дијалог и политичка култура за да се направат македонските граѓани посреќни и попрогресивни.