Премиерот Димитар Ковачевски денеска, по повод 21-годишнината од Охридскиот рамковен договор, на Фејсбук напиша дека документот што беше потпишан во 2001 година за ставање на крај на неколкумесечниот воен конфликт денеск гради, сплотув, интегрира и промовира заедништво.
„Република Северна Македонија низ годините покажа дека успешно гради заедничка иднина за сите граѓани подеднакво. Ние сме мултикултурна, мултиетничка функционална демократија, земја на пријателства, соживот и заедништво. Тоа е нашата сила, нашиот темел за развивање на држава со еднакви услови за сите Македонци, Албанци, Турци, Срби, Власи, Роми, Бошњаци и сите други заедници кои оваа земја ја сметаат за свој дом“, наведе Ковачевски.
Според премиерот Ковачевски, Охридскиот договор се темели на принципите на инклузивност, тој гради, сплотува, интегрира, промовира заедништво.
„Со овие вредности ние денес сме членка на НАТО и земја која ги отпочна преговорите со ЕУ. Нашата земја чекори по еден нов пат и одлучно и сигурно се приклучуваме на европското семејство, обединети во различностите“, напиша премиерот Ковачевски на Фејсбук.