Претседателот на македонската влада Димитар Ковачевски во изјава за медиумите остана на досегашните позиции визави прашањето за разговорите со Бугарија и влијанието врз нашата европерспектива. Финалниот документ на кој сега работи француското претседателство, а што ќе се најде како завршница на претстојниот Самит на Советот на ЕУ, не зависи од нас, рече тој.
„Ние немаме добиено предлог за деблокирање на проширувањето на ЕУ кое вклучува решенија што произлегуваат од нашите разговори со Бугарија којшто е усогласен со сите земји членки на ЕУ. За нас досега од ЕУ има 4 последователни позитивни извештаи и 45% усогласеност на нашето законодавство со ЕУ, и во одреден број на поглавја имаме поголема усогласеност од земји кои веќе ги имаат отпочнато преговорите со ЕУ. Ако прашањето е дали ќе се откажеме, не, нема да се откажеме зашто Европската Унија за нас не само што е стратешка цел туку земјите од ЕУ се наши стратешки економски партнери на кои отпаѓаат 80 отсто од трговската размена и странските инвестиции овде. А, разговорите и натаму можат да продолжат единствено врз основа на европските вредности и врз основа на одредбите од договорите со кои е формирана ЕУ, изјави премиерот Ковачевски.
Тој дополни дека кога меѓу земјите членки на ЕУ ќе се усогласи предлог текстот што како финален документ треба да произлезе од претстојниот самит, ќе биде доставен и до нас по што можеме да ги кажеме и нашите забелешки.
„Нашата позиција е јасна и произлегува од собранискиот документ до кој цврсто се придржуваме дека нема разговори за македонскиот јазик и идентитет а решението треба да содржи севкупни гаранции дека покрај барањето за вметнување на бугарите во Уставот, нема да има други барања од Бугарија за време на пристапните преговори со ЕУ, изјави премиерот Ковачевски .
Изјавата Ковачевски ја даде на Форумот Преспа Дијалог кој се одржува во Охрид.
Мирјана Трпческа