Премиерот Димитар Ковачевски за 11 часот најави средба со лидерите на партиите во владината коалиција на која ќе се разговара за предлогот на француското претседателство за кревање на бугарското вето и почеток на процесот на Македонија за членство во Европската Унија.
„Веднаш по средбата, францускиот предлог ќе го објавиме на официјалната веб страница на Владата во интегрална форма“, соопшти Ковачевски.
Тој најави оти во текот на денот, покрај средбата со коалицијата, ќе се одржат низа консулатации и разговори со експертската и стручната јавност како и медиумите.
„Како што веќе најавив вчера, целиот процес ќе се одвива транспарентно, а јавноста во детали ќе биде запозната со сите наредни чекори. Повикувам на одговорност од сите релевантни чинители во општеството, шпекулации за важни државни и национални прашања не одат никому во прилог. Барам конструктивност и поддршка од сите чинители за да донесеме мудра одлука во интерес на сите граѓани“, вели Ковачевски и апелира до сите политички актери и медиумите да се потпираат на официјалните информации од институциите.