Фудбалерите на Шкендија обезбедија пласман во третото квалификациско коло за Конференциската лига на УЕФА, откако вечерва и во реваншот во Скопје ја совладаа Валмиера со 3:1 (2:1) и со вкупен резултат од 5:2 го елиминираа противникот од Летонија.
Бејтулаи во 11-та минута, Дориев во 33-та минута и Рамадани во 85-та минута беа стрелци на погодоците за тетовските „црвено-црни“, единствениот за Валмиера беше дело на Мурата во 25-та минута.
Нареден ривал на Шкендија во квалификациите за Конференциската лига ќе биде шведски АИК, кој со вкупен резултат 4-3 ја елиминираше Ворскла од Украина.
Натпреварите се закажани на 4 и на 11 август.
Фудбалерите на Македонија Ѓ.П., пак, претрпеа убедлив пораз вечерва во Софија од ЦСКА од 4:0 (1:0) во реваншот во второто квалификациско коло во Конференциската лига на УЕФА и по минатонеделните 0-0 во Скопје го завршија настапот во третото, по ранг, европско клупско натпреварување.
Бугарскиот тим дојде во водство по половина час игра преку холандскиот интернационалец Јирген Матеиј, а водството на домаќините го удвои Георги Јомов во 61 минута.
Домаќините го заверија пласманот во следното квалификациско коло со два гола во завршницата преку Лазар Туфекџиќ (78) и Диксон Назон (87).
Елиминација во 1. квалификациско коло во Конференциската лига претходно претрпе Академија Пандев во пресметката со полска Лехија.