Литвански пратеници предложија знакот Z, со кој се обележани руските воени возила во Украина, и Георгиевската лента да се израмнат со нацистичките и комунистичките симболи.
Делење или истакнување на црно-портокаловата Георгиевска лента или знакот Z на собири или други масовни настани, според предлогот, би се казнувало со 500 евра.
„Проруските активисти ги користат тие два симбола како пропаганда и заплашување, сметаат пратениците Моника Ошмианскиене и Линас Јонаускас кои поднесоа предлог амандмани на Законјот за административни прекршоци и Законот за собири“, пренесе литванската новинска агенција ЕЛТА.
„Со години се говори за забрана на Георгиевската лента. Таа стана алатка за пропаганда и за провокација и предизвикување на поделби и непријателства меѓу луѓето, симбол на агресија и насилство што нема никаква врска со жртвите во Втората светска војна“, изјави Јонаускас од Социјалдемократската партија.
Георгиевската лента беше дел од многу високи воени одликувања што ги доделуваа Руската Империја, Советскиот сојуз и денешната Руската Федерација. Стана еден од најпрепознатливите симболи на Денот на победата во Втората светска војна, а во современа Русија е патриотски симбол со кој јавно се изразува поддршка на владата.
Во некои поранешни советски републики, како Украина, Грузија и балтичките земји, во последните години се поврзува со русофилија и руски национализам и иредентизам. Лентата, исто така, беше користена за истакнување на поддршка и при претходниот руски упад во Украина во 2014 година.
Во Литванија со закон е забрането делење и истакнување на знамиња и грбови на нацистичка Германија, на СССР и на Литванската Советска Социјалистичка Република, како и симболи на нацистички и комунистички организации, вклучително „свастиката“, симболот SS, советскиот срп и чекан и петокраката.