Брисел: Компанијата „Мајкрософт“ се согласи на измени во своите практики со цел да ја отстрани загриженоста на Брисел поради поврзувањето на популарната платформа за тимска соработка Мајкрософт Тимс со нејзините апликации Ворд, Ексел, ПауерПонт и Аутлук, преку пакетите Офис 365 и Мајкрософт 365.
Како што соопшти Европската комисија, американската компанија се обврзала да ги нуди своите пакети без Тимс и тоа по намалени цени, да им овозможи на постојните клиенти префрлање на пакети без Тимс, да обезбеди интероперабилност за клучните функции помеѓу конкурентските алатки за комуникација и соработка со одредени производи на „Мајкрософт“ и да им овозможи на корисниците да ги преместат своите податоци од Тимс на конкурентски платформи.
Според ЕК, со ова „Мајкрософт“ ќе придонесе за овозможување фер конкуренцијата и ќе го отвори пазарот за други добавувачи на алатки за комуникација и соработка.
Извршната потпретседателка за чиста, праведна и конкурентна транзиција, Тереза Рибера информира дека со ова „Мајкрософт“ се обврзува да стави крај на неговите „практики на врзување“ што ги оневозможуваше конкурентите ефикасно да се натпреваруваат со Тимс.
Тоа овозможува конкуренција на овој клучен пазар и им гарантира на бизнисите слободен избор на производот за комуникација и соработка, што најдобро одговара на нивните потреби, наведе Рибера, потсетувајќи дека од пандемијата на корона вирусот, голем број организации во Европа и низ целиот свет во голема мера се потпираат на алатки за видеоконференции, разговори и соработка.
Преземените обврски од страна на „Мајкрософт“ ќе важат во следните седум години.