Македонската фудбалска репрезентација вечерва (20.45 ч.) ѝ гостува на Италија во полуфиналниот бараж меч за пласман на Светско првенство во Катар. „Азурите“ важат за големи фаворити, но „црвено-жолтите“ најавија бескомпромисна борба за секоја топка и обид за сензација против актуелниот европски шампион. На трибините на стадионот „Ренцо Барбера“ најавено е присуство на околу 2.000 Македонци.
Победникот од овој меч во финалето ќе оди на мегдан кај поуспешниот од пресметката меѓу Португалија – Турција.
Покрај овие две средби, вечер ќе играат уште Шведска – Шкотска и Велс – Австрија. Средбата Шкотска – Украина е одложена, додека Полска службено ја доби победата против Русија.
Елмас: Шансите се 50-50
Фудбалерот на Наполи, Елиф Елмас, поради жолти картони, нема да може да ѝ помогне на македонската репрезентација на вечерашниот натпревар со Италија во баражот за Светското првенство. Меѓутоа тој верува дека неговите репрезентативни колеги можат да направат изненадување и шансите ги проценува на 50-50.
„Искрено, нè очекува многу тежок натпревар. Ги познавам многу добро фудбалерите на Италија. Играат многу поразлично од порано. Многу побрзо, поофанзивно, технички и тактички на врвно ново. Индивидуално се многу силни на секоја позиција. Соиграчите од Наполи велат дека се свесни за тежината на натпреварот. Велат дека воопшто нема да биде лесно меч за нив. Нè анализираат во детали, знаат дека е само еден натпревар, свесни се за нашиот квалитет и не смеат да нè потценат. Шансите се 50-50. Верувам во моите соиграчи, знам дека ќе го дадат максимумот и ќе направиме нов, историски успех. Имаме квалитет и ова е нова шанса да се претставиме во најдоброто издание“, смета Елмас.
И Италија се соочува со проблеми во поглед на отсуствата на фудбалери поради повреди. Неизвесни се Кјелини и Бонучи, столбови на одбраната, но Елмас смета дека Македонија треба да го запре средниот ред.
„Одбраната може да биде мал проблем за Италијанците. Фудбалерите кои се стандардни во дефанзивата со години, сега се соочуваат со повреди. Средниот ред е клучната алка и ако го затвориме тој простор ќе биде проблем за нив, сподели македонскиот креативец.