По објавувањето на делото „Silentio Pathologia“ со кое Македонија ќе се претстави на 55. Венециско биенале, Н ациналната галерија се соочила со многубројни реакции, заради како што велат оттаму, погрешно протолкуваниот аспект на примената на кожите од стаорци во проектот. Односно се јавиле организации и поединци кои реагирале дека се убиваат живи суштества за да се користат во уметнички проект.
„Ја објаснивме природата на кожите на стаорците кои се применети во проектот. Имено авторката ниту поддржува, ниту пак било кога работела со уништување на живи суштества. Таа е против злоупотребата на животните и нивното убивање. За проектот Silentio Pathologia Хаџи-Василева користеше веќе умртвени лабораториски стаорци кои се користат за исхрана на животни во золошки градини и вообичаено се дел од режим на исхрана на големи птици и мамали, рептили и змии кои се чуваат во заробеништво. Примената на кожи од страна на авторката е имено во намера на потцртување на постојаниот нелегален пазар на животни, нивните кожи и други продукти во светот. Со презентирање на реалното на публиката, како дел од конструирано уметничко дело, луѓето се соочуваат со несокриената вистина за животните, пазарот со нив и комодификацијата на продукти од животни.
Живите стаорци пак се набавени од италијански набавувач на миленичиња и се тренирани како миленичиња, тие секојдневно се негуваат, и има постојана грижа за нив како што препорачуваат експертите за одгледување на стаорци.“ се вели во соопштението од Националната галерија на Македонија.
Инаку, речиси сите дела на авторката Елпида Хаџи-Василева се направени на начин да го рефлектираат местото и локацијата каде делото е направено и изложено и особено, таа користи отфрлени или рециклирани материјали.
„Никогаш не иницирала или нарачала, ниту пак имала намера, да повреди било какво животно“, велат од Националната галерија
Отворањето на македонскиот павилјон на Венециското биенале ќе се одржи на 31 мај, во 15 часот, последниот ден од трите денови (29,30,31 мај) пред Биеналето да се отвори за публиката, а кои се резервирани за стручната јавност.