Close Menu

Македонско – американските односи издигнати на ниво на незаменливо сојузништво

0
By on ПОЛИТИКА
Добрите македонско – американски односи кои американската страна ги толкува како незаменливо сојузништво, уште еднаш се потврдени во телефонскиот разговор меѓу премиерот Димитар Ковачевски и американскиот државен секретар Ентони Блинкен.
– САД се фокусирани на поддршката за проширувањето на ЕУ со Западен Балкан. Поддршката на Вашингтон за земјава, доаѓа од целосната посветеност на Северна Македонија на вредностите на НАТО, кои земјата ги докажа и во поддршката за Украина којашто е целосно хармонизирана со сите сојузници во НАТО, рекол Блинкен во телефонскиот разговор со Ковачевски, информираат од Владата.
Притоа Блинкен ја поздравил новата динамика во македонско – бугарскиот дијалог и изразил надеж дека следува решение за прашањата меѓу двете земjи за време на француското претседателство со ЕУ.

– САД и Северна Македонија стратешкото партнерство го издигнаа на ниво на соработка која нè прави незаменливи сојузници во НАТО и во заедничките мисии на Алијансата, констатирал во разговорот американскиот државен секретар Блинкен.

Од своја страна, претседателот на Владата Ковачевски ја изрази благодарноста на народот и на Владата за поддршката на САД од независноста до денеска, која што е проследена и со одлични билатерални односи а за  стратешкото партнерство со САД рече дека е од суштинско значење, кое е крунисано со поддршката на Вашингтон за нашето членство во НАТО, заклучил Ковачевски коментирајќи го членството во НАТО како огромна привилегија и одговорност.

Премиерот Ковачевски ја осуди руската агресија во Украина како неиспровоцирана и како грубо кршење на меѓународното право, ја реафирмира цврстата поддршка за суверенитетот и територијалниот интегритет на Украина во нејзините меѓународно признати граници и ја поздравија брзата, обединета и решителна реакција на меѓународната заедница.

За време на разговорот Ковачевски и Блинкен изразија задоволство од усогласеноста и ефикасната координација на НАТО и ЕУ во санкционирањето на Русија, како и во организирањето на ефикасна поддршка за Украина кон која се приклучи и Северна Македонија.

Премиерот Ковачевски ја изрази неговата благодарност до САД за поддршката за Северна Македонија во евроинтегративниот процес и го поздрави апелот на САД дека е потребно негово забрзување со отворање на пристапните преговори меѓу ЕУ и Северна Македонија.

Ковачевски потенцираше дека нема време за губење и дека секое натамошното одложување може да има сериозни регионални последици и широко да ја отвори вратата за зголемено влијание на трети страни во регионот.

Share.