ЗОРАН ИВАНОВ
Кога дечките од Бихаќка веќе прашуваат што граѓанството мисли за кадровскиот состав на кандидатските листи во шесте изборни единици за мајските 2024, еве, во една реченица, еден индивидуален, субјективен и секако невалиден суд но, додека не се официјализирани листите во нив, нека си просудат и самите дали нешто итно да си променат па, еве по некаков ред, прво, ако се сигурни во победата или барем дека ќе учествуват во власта, да си ги си извадат министрите од листите или барем да си ги симнат што подолу во списокот додека со својот „авторитет“ изборно не си ја доурнисале паријата зашто, нека си ги прашаат пошироко граѓаните гласачи, на некои од нив со позиции каде што ги вметнале како втори, трети на листите, рејтингот им е не нула, туку нула минус и, натаму или второ, министерките и министрите кои, дури и да биле најдобри но кои поради некакви објективни причини и околности реално не биле во можност да си ги постигнат целите, ете им избори па нека си бидат пак министерки и министри и, конечно, трето, дечките од Бихаќка би требало да имаат слух, да имаат предвид дека Македонија има нивни фанови граѓански авторитети, ликови способни, чесни, афирмирани, стручни, авторитетни и дигнитетни, докажани во своите потесни и пошироки окружувања па, ете, нека си ги стават нив на листите втори, трети, …., седми, а натаму нека си ги редат министерките и министрите и оние објективно способните и оние докажано неспособните кои, не само што не си ја завршија мандатската работа туку и кои на партијата од Бихаќка и` направија големи предизборни штети и, за крај, мала утеха е што партискиот конкурент, исто така, горе на листите си ги нацртал докажаните корумпирани режимски кадри зашто тие се друга тема, а за првата, за вашата, си знаете вие.