„Наместо да кажат со какви задачи се соочувале како претседатели, што направиле за остварување на стратешките цели поставени во 1991, членство во НАТО и во ЕУ и кои се научените лекции, тие распалија по актуелната власт. Ваква немилосрдна канонада против владата на Зоран Заев, но, индиректно, и на претседателот на државата Стево Пендаровски е на рамниште на онаа што секојдневно доаѓа од опозициската партија ВМРО-ДПМНЕ“, вели професорот, политички аналитичар и поранешен министер за надворешни работи Денко Малески во текст објавен на Плусинфо.
Малески ги коментираше вчерашните говори на поранешните претседатели Бранко Црвенковски и Ѓорге Иванов во МАНУ, во кои тие ја критикуваа состојбата во државата и актуелната власт.
Црвенковски, меѓу другото, рече дека Македонија е „корумпирана држава која живее од кредити“, додека Иванов кажа дека државата е „заробеник на провинцијализам, во нарцисоидната егоцентричност на својата елита“.
Малески вели дека во демократските земји, поранешните претседатели се најчесто воздржани во своите излагања во јавноста и како пример ги зема Соединетите држави.
„Едноставно, сметаат дека не е фер ниту е пристојно, кога друг ја носи одговорност за управување со државата, тие да се прават паметни и да судат што е добро а што лошо“, вели Малески.
„Вака зборуваат претседатели кавгаџии кои не можат да се соочат со недостатоците од сопственото владеење во кои постоеле сите елементи за кои се критикува сегашната власт. Каков е тогаш тој апел за домашен консенсус околу некаква национална платформа од некој кој на власта најотворено ѝ објавува војна?“, прашува тој.