„Се согласувам со ставот на Судскиот совет и потврдувам дека усогласениот договор на партиите не значи менување на процесните закони, ниту на измислување на механизам за заобиколување на законите. Во текстот стои дека се бара мониторинг од ЕУ и од меѓународните фактори, што ќе видиме во која форма и како ќе биде спроведено“ кажа министерот за правда Бојан Маричиќ во емисијата „Клик плус“ на ТВ21.
Тој додаде дека Владата ќе побара мониторинг на случаите кои се договорени помеѓу СДСМ и Алтернатива, а потоа Европската комисија ќе одлучи дали и на кој начин ќе се вклучи во следењето и проверката на предметите.
-Честопати сме имале ситуација во која сме утврдувале некоја цел и сме ја вклучувале ЕУ како фактор, а потоа тие го преобликувале нашето барање, го одбивале или го прифаќаше. Не знаеме што ќе ни каже ЕУ. Ако сме се договориле со Алтернатива дека ќе побараме меѓународен мониторинг, тоа ќе го направиме. Што ќе добиеме како одговор, не знаеме, потенцираше Маричиќ.
Тој повтори дека Владата нема намера да ги загрозува постоечките механизми, кои според Маричиќ треба да се зајакнат за да не доаѓаме до вакви ситуации, каде што се јавуваат сомнежи кај јавноста за одредени пресуди.
-И претходно партии кај нас барале меѓународен мониторинг. Меѓу нив и ВМРО-ДПМНЕ. Пред две години беше побаран мониторинг за предмети од висока корупција, а голем дел беа оние од СЈО и за нив опозицијата тврдеше дека се монтирани. Од ЕУ побаравме мониторинг и веќе дваесетина случаи се под таков вид на набљудување. Таков механизам за набљудување на случаи кај нас не е нов, ние имаме историја на улога на ЕУ на креирање и помагање на нашиот правосуден систем, кажа Маричиќ.
Министерот истакна дека ќе се сретне со претставниците на политичките партии да зборува за механизмите од договореното.
-За оние предмети што се завршени можеме да побараме од ЕУ да изврши некаков мониторинг, но механизмите за тие случаи одново да се отворат лежат во домашното право. Доколку тука се исцрпени сите можности, останува странките да се обратат до Судот во Стразбур, рече Маричиќ.