Актерот Мето Јовановски утревечер ќе ја прими наградата „Актер на Југоисточна Европа“ што ја доделува фестивалот „СЕЕ во Париз“. Ќе биде прикажан филм за неговиот пат во уметноста, а наградата ќе му ја врачи познатиот француски актер Тјери Фремон.
Фестивалот чиј основач е Јордан Плевнеш, ќе го отвори режисерот Бранко Балетиќ со документарецот „Вечниот Његош“, во чест на 200 години од раѓањето на славниот црногорски владика и поет. Ќе биде прикажан и играниот филм „Ноќни бродови“ на хрватскиот режисер Игор Мирковиќ.
Македонија учествува на фестивалот заедно со држави од 11 земји од ЈИЕ. Настаните се одвиваат во Националниот институт за ориентални јазици и цивилизации, каде се изучуваат 96 странски јазици, меѓу кои и македонскиот. Програмата на играни филмови ќе се одржи во Културниот центар „Лантрепо“.
На фестивалот се доделуваат неколку награди. Во селекцијата за кратки филмови, конкурираат дела на: Вардан Тозија, Горан Тренчовски, Ибрахим Деари, Дукаќин Борова и Илија Цветковски. Ќе се одржи и книжевна средба„ Балкан-Европа“, на која ќе учествуваат Французите Адонис, Франсис Комб и Жан-Пјер Симеон, како и балканските автори Николај Стојанов, Видосав Стевановиќ и Абдулах Сидран.