Филип Миркуловски и Стојанче Стоилов вечерва го одиграа последниот натпревар за македонската ракометна репрезентација. И ќе го паметат по убаво прошталниот меч, бидејќи учествуваа во триумфот на „црвено-жолтите“ против Чешка со 27:25 за осми нивни пласман на Светските првенства, во случајот на турнирот во 2023 година чии ко-домаќини ќе бидат Полска и Шведска.
„Ова беше натпревар полн со емоции за мене, бидејќи го играв последниот меч за македонската репрезентација која премногу ми значеше. Но, најважно е дека победивме, ја остваривме целта и се пласиравме на Светското првенство. Ми претставуваше голема чест што 20 години играв за Македонија и во секој настап го давав максимумот. Се надевам дека така ќе продолжат и оние кои надоаѓаат оти мора да се гине за овие бои“, изјави Миркуловски по мечот.
Но, ако неговата одлука за завршување на репрезентативната кариера беше позната, тогаш изненадувачка беше на Стојанче Стоилов кој објави на прес-конференцијата по победата над Чешка.
„Среќен сум што победивме и што се пласиравме на Светското првенство. По 15 години настапи, со гордост објавувам дека ова беше мојот последен меч за репрезентацијата. Не сакам да фаќам место и минутажа на помладите, Пешевски заслужува повеќе шанса. Здравствено не можам да издржам цела сезона, нема одмор, а телото не издржува“, изјави Стоилов.
Селекторот Кире Лазаров ќе биде во улога и на играч уште некое време. Вели има време за простувања, ако се случело вечерва, ќе претставувало дополнителен притисок за него, меѓутоа нагласи дека 90 отсто ќе биде во тренирка до СП 2023.