Посветено и многу напорно работиме на претстојниот состанок на Советот на ЕУ да донесеме одлуки со кои следните чекори во однос на проширувањето да се движат во вистинска насока. Посветени сме на прашањето Македонија и Албанија да ги почнат пристапните преговори со ЕУ и сме вклучени со Франција да се надмине билатералниот проблем со Бугарија и во однос на ова прашање очекувам развој многу брзо, изјави претседателот на Советот на ЕУ, Шарл Мишел на заедничката прес конференција со македонскиот претседател Стево Пендаровски. Мишел не потврди дали има француски предлог до Бугарија, за кое утрово информира премиерот Кирил Петков и дека тој ќе бил усвоен од собранието,, но замоли да сме подискретни на неколку дена до самитот со цел успешност на процесот.
„ Сакам да потврдам дека навистина работиме напорно да постигнеме конкретни резултати наредната недела на Советот. Има три тешки и важни теми: ќе се разговара за ЕУ апликацијата на Украина, Грузија и Молдавија, вториот елемент за кој е важно да се биде сериозен е да го енергезираме процесот во Западен Балкан, како да се постигнат повеќе резултати и како да стане процесот повидлив. Една платформа да се стави веднаш во акција да се почне да се работи на нешто конкретно. Важно е дека сакаме да го одблокираме процесот со Албанија и Македонија да почнат преговорите што побрзо, важно е да се одржува темпото и да се биде исклучително активен. На овој Совет ќе направам се за да направиме да се преземат одлучувачки чекори. Во поглед на Европската политичка заедница , сакам да потврдам дека тоа не е алтернатива за членство во ЕУ , туку нешто што ќе ни биде поттик за соработка и координација на земјите од европскиот континент каде што има земји и кои не сакаат да се зачленат во ЕУ, изјави претседателот на Советот на ЕУ, Шарл Мишел.
Претседателот Пендаровски ги претстави очекувањата на земјава од претстојниот Совет на ЕУ, земјава да добие датум за почеток на преговорите со ЕУ. Рече дека не знаат за никаков предлог на Француското претседателство до Бугарија. Тоа се однесува на координацијата меѓу земјите членки на ЕУ, а она што ние знаеме е дека се одржуваат разговори со Бугарија и во моментов дека разговараме. Не сакам во заклучокот за Македонија да видам параграф дека треба да направите уште ова, бидејќи имаме направено се за да ги почнеме пристапните преговори.
„ Искрено се надевам дека следната недела во Брисел на престстојниот самит, лидерите на ЕУ конечно ќе го исполнат сопственото ветување дадено на Македонија од март 2020 година кога Советот за општи работи едногласно донесе одлука во најкус можен рок да започнат преговорите со Северна Македонија. Со пролонгирање на почетокот на преговорите, се разнишува кредибилитетот на ЕУ што истовремено значи опаѓање на нејзиното влијание меѓу нашите граѓани. Условувањето на земја членка кон земја кандидат за членство поради билатерални причини, може целосно да ја компромитира политиката на проширување и да прерасне во опасен преседан кој би можел да стави крај на овој процес кој со години важеше за многу важен дел во надворешната политика, изјави претседателот Пендаровски.
Одговарајќи на новинарско прашање на бугарски новинар, претседателот Пендаровски настапи со уверување дека во Мкаедонија и власт и опозиција немаат проблем со тоа да ги вметнат Бугарите во Уставот, но дека тоа не е услов кој би можел да се изполни за една недела туку дека тој би траел во најредовна процедура меѓу 95 и 100 дена. За тоа македонската страна рече Пендаровски ќе бара гаранција и од Бугарија но и од ЕУ, дека ова е последно барање од Бугарија. „Сме се изгореле повеќе пати овде на Балканот, така да не е лошо покрај усно да биде напишано нешто и на хартија“, заклучи македонскиот претседател Пендаровски.
Мирјана Трпческа