Сирискиот пасош во сопственост на 25-годишниот Ахмед Алмухамед, не бил пронајден во остатоците на камиказа-бомбашот, туку до него, како да сакал некој истиот да биде пронајден. Оттаму дилемата кај француските власти кои ја водат истрагата, дали терористите намерно го подметнале пасошот.
– Заинтригира всушност што пасошот воопшто и се појавил таму, вели француски официјален претставник за британски „Индепендент“, надополнувајќи дека пасошот не бил во остатоците на телото туку бил покрај него.
Се работи за човекот кој влегол во Европската унија, односно Грција заедно со уште 70 други бегалци откако потонал бродот со кој биле превезувани на 3.октомври.
Според американските разузнавачки служби, се уште се утврдува дали пасошот е валиден воопшто, бидејќи бројот на документот не се совпаѓал со името и фотографијата. Француските полициски сили се сомневаат дека сирискиот пасош, и уште еден пронајден на улиците, се фалсификувани документи кои биле направени во Турција.
Француските експерти велат постојат три можности за да се реши дилемата. Едната е дека камиказата-бомбаш е Ахмед Алмухамед. Другата е дека се работи за терорист кој лажно се претставувал како бегалец. А третата е дека се уште не е идентификуван вистинскиот идентитет на бомбашот, но пасошот бил подметнат за да се засили пропагандата против бегалците.
Сепак тие се помеѓу најпогодените од терористичките напади во Париз. Бегаат од теророт на ИСИС во Сирија, а огромен дел од европскиот народ ќе наседне на пропагандата дека бегалците со себе носат радикален џихадизам.
Од она што е утврдено, пасошот со име Ахмед Алмухамед минал низ Грција, Македонија, Србија, Хрватска и оттаму во Унгарија од каде планирал да се упати во Австрија. Австриските власти велат дека немаат податок за човек со такво име на нивна територија.
Германската министерка за одбрана, Урсула вон дер Лејен за овој случај сепак вели дека не смеат да се помешаат бегалците со терористите, притоа сомневајќи се дека вистинското лице Ахмед Алмухамед учествувал во нападите.
– Тероризмот е толку добро организиран што не би ризикувал да ги минува смртоносните морски води (за влез во Грција), вели таа.
Приказната за инволвираноста на бегалците во терорстичките напади е идеја која ја протнуваат претежно десничарските медиуми и политичари во Европа.