Министерството за образование и наука го воведува како задолжителен предметот Иновација и претприемништво, иако веќе една недела тече наставата во основните училиштата. Наставниците кои ќе држат настава по овој предмет допрва ќе се обучуваат.
Според наставната програма испратена од Министерството за образование и наука од областа предметот „Иновации“ во деветто одделение од основното образование има статус на редовен предмет со фонд од 36 часови годишно.
Наставничкиот кадар од ОУ „Сандо Масев“ со кој НОВА разговараше велат дека ќе се зголеми бројот на часови на учениците, а наставниците кои не се подготвени се уште немаат учебници за истиот предмет.
Денеска на состанок со советниците во Бирото за развој на образование во Струмица на директорите од основните училишта им било кажано дека овој предмет треба да биде вметнат во програмата од 1 септември, а директорите да утврдат кои наставници ќе предаваат по истиот. Инаку претходно во нормативот за наставен кадар стои дека настава по овој предмет може да држи наставник со завршени студии по економија, односно со завршена обука(сертификат) за иновации и претприемништво.
Од основните училиштата покрај многуте забелешки се пожалија дека дополнителните часови по предметот нема да бидат платени и дека самите треба да се снаоѓаат за материјали кои пак можеле да се најдат во наставната програма за средните училишта.
НОВА побара одговор од МОН зошто е вметнат нов предмет кога веќе е започната школската година и на кој начин наставниците ќе држат настава без учебници и допрва ќе се обучуваат за предметот Иновации и претприемништво. Одговор не добивме.