Претседателот на Русија, Владимир Путин денеска изјави дека руските сили ќе прекинат со воената операција во Украина само ако украинската страна прекине со огнот, како и дека е подготвен за дијалог со Украина со посредство на меѓународните партнери.
По едночасовниот телефонски разговор со турскиот претседател, Реџеп Таип Ердоган, Путин нагласи дека руската воена операција ќе биде прекината ако се исполнат условите на Москва, пренесе „Ројтерс“.
Вооружените сили на Руската федерација прават сè што можат за спасување на животи и да обезбедат сигурност на цивилите. Прецизните удари се изведуваат исклучително врз објекти на воената инфраструктура, нагласува руската страна, пренесува „Спутник“.
Како што се наведува во соопштението на прес-службата на Кремљ, „посебно сурово и цинично делуваат националистичките и неонацистички формации кои продоложуваат со интензивно гранатирање на Донбас и кои во украинските градови и населени места ги користат цивилите како жив штит, вклучувајќи ги и странците кои ги држат како заложници“.
Руската државна телевизија јави дека во тек е разговор и меѓу Путин со францускиот претседател Емануел Макрон, пренесува „Ројтерс“.
Француската телевизија БФМ објави дека телефонскиот разговор меѓу двајцата лидери почнал по 12.30 часот, пренесе агенцијата ТАСС.
Ова е четврти телефонски разговор меѓу Путин и Макрон во последните 10 дена.