Полицијата привела околу 1.200 луѓе во врска со нападот на складот за зеленчук кој е под управа на доселениците од Кавказ, а кој вчера беше мета на напади на демонстрантите кои протестираа поради убиството на еден жител на Москва во квартот Западно Биријуљово, соопшти московската полиција.
Според полицијата овие лица се приведени со цел да им се проверат документите и евентуално учество во кривични дела, објави Ал Џезира.
Полицијата во текот на рацијата во еден автомобил пронашла неколку милиони рублји, три пиштоли, два ножа и една безбол палка.
Во квартот Западно Биријуљово од утрово има над 400 полицајци кои приведуваат лица, а складиштето за овошје е затворено.
Демонтрантите синоќа најпрво упаднаа во еден трговски центар и ги искршија излозите, а потоа го нападнаа складот за зеленчук кој е под управа на доселениците од Кавказ, со извици, „Русија на Русите“ и „Бела моќ“, објави БиБиСи.
Според началникот на московската полиција Анатолиј Јакунин станува збор за „екстремисти“, од кои многумина биле пијани.
А очевидците напаѓачите ги оквалификуваа како припадници на радикални националистички групи и фудбалски клубови.
Во четвртокот беше убиен Русинот Јегор Шербаков (25) откако се обидел да ја заштити од навреди девојката која ја испраќал до дома.
Полицијата објави фотографија од сосмничениот од сигурносните камери, но тој се уште не е идентификуван.
Во саботата околу 40 луѓе се собраа во истата област, барајќи од полицијата виновникот да биде казнет.
Локалците обвинуваат дека локалната власт ги затскрива кривичните дела кои ги прават мигрантите.