Министерот за финансии, Фатмир Бесими во рамки на пролетните средби со претставници на ММФ и на Светска банка во Вашингтон, оствари средба со заменик-помошникот на државниот секретар на САД за европски и евроазиски прашања и специјален претставник за Западен Балкан, Габриел Ескобар, соопшти Министерството за финансии.
– Mожноста за продлабочување на економската соработка со САД и енергетската криза биле главни теми на дискусија. Од своја страна високиот американски дипломат ја потврди неизмерната политичка поддршка од страна на САД за нашата земја како и силната агенда за земјите од Западен Балкан општо. Заложбите на САД целиот регион да се интегрира во ЕУ се видливи и недвосмислени. Економската интеграција на целиот регион е значајна и за ЕУ и за Западен Балкан, и иницијативата Отворен Балкан има значаен потенцијал да даде резултати во регионалната соработка, истакна Ескобар, соопштуваат од (МФ).
Покрај политичката поддршка што во континуитет доаѓа од страна на САД, на средбата се иницирало и за економска и бизнис соработка меѓу двете земји при што заеднички било констатирано дека постои огромен потенцијал за американски инвестиции кај нас од аспект на сојузништвото во НАТО.
Тоа, како што информираат од Министерството за финансии, ќе биде активност на која двете страни ќе се посветат во претстојниот период за да се изготви план и агенда за билатералната американско-македонска соработка.
На средбата, Ескобар упатил благодарност што земјава се приклучила кон повикот за запирање на воените дејствија во Украина, се наведува во соопштението од (МФ).