Новата македонска Влада ги „ситни“ првите сто дена, кои важат за „меден месец “ на секоја извршна власт бидејќи е неформален рок за нејзина адаптација и согледување на состојбите.
Веќе наредниот четврток, Ковачевски и неговите избраници ќе седнат на „жешките“ собраниски столчиња на кои ќе треба да се соочат со љубопитноста на пратениците, дотолку повеќе што ваква седница не е одржана дури од лани летото.
Имено, последните пратенички прашања односно пленарната седница со број 47, се одржала на 30 јули, 2021 година. По пауза поради локалните избори а за тоа говорницата да не се користи за предизборно препукување, следна пленарна седница со реден број 51 е свикана за 23 декември 2021 година, но таа не се одржа зашто владата предводена од Заев, поднесе оставка.
Дека наредниот четврток на 28 април, ќе има пленарна седница за пратенички прашања, денеска објави кабинетот на претседателот на Собранието Талат Џафери кој имал координација со пратеничките групи. .
На денешната координација се договорило утре, вторник, (19.04) да се одржи новата 69. седница со почеток во 11.00 часот.
Согласно здравствените протоколи, претседателот Џафери , на координацијата известил дека и во законодавниот дом се укинува мерката за задолжително носење маски во затворен простор но дека мерката за мерење на телесната температура при влез во Собранието останува во важност.
Од утре почнува да функционира и бифето како и прес центарот од каде новинарите покрај со физичко присуство, ќе можат да ја следат работата на собраниските тела.
(М.Трпческа)