Над три четвртини од луѓето во Финска поддржуваат членство во НАТО, покажува најновото истражување, што, според локалните медиуми се должи на руската инвазија на Украина.
Поддршката за членство во НАТО досега беше стабилна на 20 до 30 отсто, но во последните месеци се зголеми во Финска, како и во соседна Шведска, кои досега беа воено неутрални.
Околу 76 отсто од Финците сега сакаат земјата да се приклучи на НАТО, за разлика од 60 отсто во март, според анкетата нарачана од радиодифузерот YLE и спроведена од истражувачката компанија „Талоустуткимус“. Анкетата, исто така, покажа дека мнозинството е „за“, без разлика на партиската припадност. Посебна анкета минатата недела покажа дека повеќето пратеници се за членство во НАТО или изразено во бројки 121 од 200 пратеници „за“, а само 10 „против“.
Финска и Шведска се приближија до Алијансата и размислуваат за можна заедничка кандидатура за подобро да се заштитат од нивниот сосед, Русија.
Според Алијансата, постои широка поддршка за добредојде на земјите во НАТО, но нивното членство треба да биде ратификувано од парламентите на сите 30 сегашни земји-членки.