Во вторник нема да има настава во основните и средните училишта во Струмица, велат од регионалниот синдикат на СОНК во Струмица. Професорите и наставниците ќе бидат на работните места, но нема да ги извршуваат своите задачи, изјави Претседателот на СОНК во струмичко – радовишкиот регион, Никола Џорлев.
„ Ние ја поддржуваме одлуката на СОНК за генерален штрајк, впрочем таа одлука не е донесена сега туку уште пред шест месеци. Имаше доволно време за преговори со Владата и да се исполнат барањата на СОНК, но истите не беа прифатени. Во вторник наставниците и професорите од основните и средните училишта во општина Струмица ќе ја бојкотираат наставата“, вели Џорлев.
Тој додаде дека има најава за поддршка од училишта во општина Ново Село, како и поединечни наставници од општина Василево.
Дел од наставниците велат дека се соочуваат со закани и притисоци доколку ја бојкотираат наставата во вторник.
Дека има вакви закани од страна на директорите и градоначалниците, ни потврдија и од регионалниот синдикат. Од таму додаваат оти освен заканите дека наставниците ќе го изгубат работното место и ќе бидат сменети со други наставници, имало и лични закани.