Дестан Јонузи
„Уставни измени до крајот на годината“ и „интересни настани“ во наредниот период – најави министерот за здравство и претседател на владејачката Алијанса за Албанците, Арбен Таравари.
Од друга страна и партнерот на Таравари, премиерот Христијан Мицкоски најави дека во наредниот период конечно патот на Македонија до полноправно членство, ќе биде широко отворен и ќе се вреднува според компетенции, а не билатерални прашања.
Но на што се должат овие најави? Како Мицкоски од тврдото „НЕ за уставни под Бугарски диктат“, сега гледа „дупка“ за напредок?
Петар Арсовски – политички аналитичар и публицист за „Фронтлајн“ вели дека не гледа дека Софија ќе се откаже од нешто што веќе го има добиено, а Мицкоски мора да добие нешто различно од сегашниот пакет.
– Јас може да видам две варијабли кои може да влијаат на тој став. Едното е средбата на ЕУ проширување во Будимпешта, која се одржа под претседателство на Унгарија, и второ средбата со Макрон. Можеби таму разговарале за некои работи кои влеваат некаков оптимизам. Владата цело време тврди дека е посветена на евроинтеграциите, но сепак домашните предизвици ќе останат. Обезбедување на мнозинство, обезбедување на некакви гаранции како што вели владата… Ние пакетот не сме го виделе, така што реално не можеме да процениме каков став ќе заземе владата, ако и кога ќе има некој став, анализира Арсовски.
Тој, не гледа дека Софија ќе се откаже од нешто што веќе го има добиено, но додава, дека ако се состави влада во Бугарија, и ако постои притисок од меѓународната заедница, да почекаме да видиме дали тоа ќе вроди со некаков плод.
– Засега не знаеме да оцениме дали може да се очекува или не некави гаранции од Софија. Мицкоски мора да добие нешто различно од сегашниот пакет, подвлече тој.
Арбен Таравари претседател на Алијансата за Албанците изјави дека е оптимист дека пред Нова година земјата ќе ги спроведе уставните измени за внесување на Бугарите во Уставот, со што ќе се деблокира евроинтегративниот пат.
– Мислам дека ќе има уставни измени. Јас сум многу оптимист дека до крајот на годината ќе најдеме можност за уставни измени, изјави Арбен Таравари.
Таравари исто така најави дека ќе има интересни настани во овој период, па да дадеме време, како што вели тој, да видиме дали партиите повторно ќе побараат избори по Нова година.
Интересни настани, како што ги нарекува Таравари, најави и Мицкоски, алудирајќи на криминални и корупциски афери.
Премиерот Мицкоски има разбирање, но и свое објаснување за изјавата на идната еврокомесарка за проширување Марта Кос која очекува Македонија да го смени Уставот како што ветила, ни повеќе ни помалку. Смета дека ваквиот нејзин став бил со цел да ја добие поддршката и од бугарските европратеници, но уверен е дека во наредниот период конечно патот на Македонија до полноправно членство, ќе биде широко отворен и ќе се вреднува според компетенции, а не билатерални прашања.
– Ја разбирам еврокомесарката, таа требаше да го помине ‘хирингот’ на кој требаше да гласаат и европратеници од нашиот источен сосед и тоа е во рамките на таа димензија. Мислам дека низ таа оптика таа ги гледаше тие пораки и јас низ таа оптика ги гледам тие пораки, вели Мицкоски.
Мицкоски, оптимизмот, како што вели го темели на сите средби кои ги имал изминатите 5 месеци како премиер. Меѓу нив и последната со францускиот претседател Макрон по која соопшти дека разговарале за одблокирање на патот на Македонија кон Европската Унија.
Ако се изгласат уставните измени Северна Македонија автоматски може да ги почне проговорите за членство во Европската Унија.
Текстот е сопственост на Фронтлајн.мк