Штрајкот во училиштата и градинките е почнат како што планиравме и во најголем дел е без сериозни проблеми, изјави Јаким Неделков, претседател на Самостојниот синдикат за образование, наука и култура (СОНК), за МИА.
Во текот на денот, СОНК ќе одржи и прес-конференција на која ќе информира за оценка за штрајкот и евентуално за проблеми.
-Ако евентуално имало конфликтна ситуација или вршење на притисок врз оние кои штрајкуваат да прифаќаат децата. Најавивме дека штрајкувачите ќе бидат во посебна просторија. Одговорноста за прифаќање на учениците, односно на децата во градинките, ќе биде на директорите. Не може по секоја цена или со сила да ги принудуваат штрајкувачите да прават тоа што не треба да прават за време на штрајкот“, додаде Неделков.
Генералниот штрајк во училиштата и градинките го организира СОНК, бидејќи не е исполнето нивното барање за зголемување на платите на вработените во образованието и градинките за 18,4 проценти, односно нивно усогласување со порастот на миниманата плата, која од овој месец е зголемена од 15.200 на 18.000 денари, како и дополнително – минималната плата да биде основица со која ќе се множат коефицинетите на сложеност на работни места.
Преговорите меѓу СОНК и Владата во изминатите две недели завршија без договор. По последната средба минатиот понеделник, Неделков рече дека нема краткорочно решение со кое веднаш ќе се зголемат платите на дејностите што ги застапува Синдикатот, кој поради тоа денеска го активираше најавениот штрајк.