Во пресрет на најавениот штрајк на просветните работници, кој ќе почне на 11 април, Министерството за образование и наука, заедно со Владата и со Министерството за финансии прават анализи на буџетот за можно зголемување на платите во образовниот сектор.
Премиерот Димитар Ковачевски во интервју за „360“ на ТВ Алсат-М, истакна дека дијалогот со Синдикатот за образование, наука и култура (СОНК) продолжува.
„Разговарав со претставници на советот на Народната Банка, од причина што доколку ги зголемите платите колку што е вкупно барање на синдикатите, тоа може да произведе дополнителен инфлаторен притисок. А дополнителен инфлаторен притисок ќе значи дека и платата која ќе ја добијат работниците, таа после многу кратко време нема да вреди. Ако се зголеми инфлацијата тогаш обврската на Народната Банка е да интервенира преку зголемување на каматните стапки, што значи дека и долговите кои што ги имаат тие граѓани на тековни сметки на кредитни картички со зголемувањето на каматните стапки, ќе се зголемат и нивните обврски за плаќање. Затоа мора да се балансира решението помеѓу она што го бара синдикатот и она што како можност го нуди буџетот“, рече Ковачевски.
Тој посочи дека Владата со антикризните мерки, како намалувањето на ДДВ-то од 5% на 0% на основните прехранбени продукти, им излезе во пресрет на граѓаните да не дозивеат ценовен шок.
„Граѓаните ќе мораа месечно да плаќаат по 1.500 денари плус, доколку не беше намалувањето на ДДВ-то на енергенсите на нафтата и нафтените деривати, само по тој основ без намалување на акцизата секој граѓанин на просечна потрошувачка пресметано ќе плаќаше 300 денари повеќе секој месец, кај електричната енергија доколку не се направеше субвенционирање на производството на електрична енергија и на цената на која што ја плаќаат граѓаните значи 80% ја субвенционира државата, сметките за струја на секое семејство ќе беа за 2.150 денари повисоки“, истакна Ковачевски.
Во интервјуто, тој се осврна и на пописот, посочувајќи дека тоа е статистичка операција, а не етничка, ниту политичка операција, и оти државата го спроведе со цел да ги имплементира своите економски и развојни политики врз основа на бројки.
Во однос на етничката застапеност и намалувањето на бројот на населението, Ковачевски вели дека тоа било исто распределено кај сите етнички заедници, и дека тоа е заедничко за сите земји од Балканот.
„Затоа овој попис е од значење за да креираме економски политики кои што ќе се свртат кон човечкиот капитал, кон инвестициите и кон отворање на поголеми можности, особено за младите да останат во земјата“, рече Ковачевски во емисијата „360“.
Пописот, вели, бил спроведен врз основа на методологија која што е одобрена од страна на „Евростат“ и со присуство на експерти од ЕУ.