ДУИ ги кочи кадровските смени во здравството бидејќи не сака да комуницира со Алијансата на Албанците, неофицијално дознава НОВА, од високи партиски извори. Наводно, од ДУИ воопшто не одговарале на повиците и барањата да седнат и да се договорот за кадровските смени во здравството. Од тие причини од минатата недела нема кадровските смени, а коалиционите партнери не можат да седнат и да се договорат каква ќе биде распределбата на директорските места во клиниките и болниците.
Освен смените на неколку клиники на почеток, нема никакви други промени, а работите закочија и тапкаат во место. Тоа создава дополнителна тензија и нервоза кај вработените кои се во исчекување, но и кај кандидатите за директорски места, велат нашите извори.
Заменикот министер за здравство Гоце Чакаровски за НОВА вели дека не знае колку директорски места бараат од ДУИ, но се надева дека во скоро време, можеби и викендов ќе седнат на заедничка маса.
„Смени ќе има секаде, но засега ништо не е ставено на маса“, изјави за НОВА, Чакаровски.
НОВА, побара одговор и од ДУИ дали навистина ја кочат работата и соработката со коалиционите партнери и како ќе се реши проблемот, но од таму нема никаков одговор.
Дополнително, во Министерството за здравство велат дека директори кои и имаат решенија и не се вд. не можат да бидат разрешени додека не им помине мандатот, но, такви се малку. Досега се сменети само директорите на клиниките за кардиологија, нефрологија, онкологија, неврохирургија и токсикологија, додека разрешувањата на економските директори се одвиваат непречено.
Иако од Министерството за неделава најавија кадровски смени на скопските клиники, НОВА дознава дека тоа сепак нема да случи. Како и да е во текот на наредната недела најверојатно ќе се случат дел од кадровски смени на скопските клиники. Таму веќе се шпекулира со имињата на Љиљана Којиќ како кандидат за директор на Клиниката за детски болести, на Максилофацијална хирургија каде сериозен кандидат е Славе Наумовски, на Клиниката за гинекологија се спомнува името на Ана Данева, во тетовската болница Агим Рамадани. Според извори на НОВА од клиниките Аспазија Софијанова, актуелната директорка на детска клиника наводно се помирила со тоа што ќе биде разрешена, но затоа пак очекувала дека ќе остане во тимот за трансплантација, веројатно на местото координатор иако веќе се знае кој ќе раководи со овој тим. Уште неколку директори кои сакаат да си ги задржат местата деновиве се растрчани по сопствена промоција за да покажат дека ги заслужуваат функциите, а има и такви кои лобираат за себе кај надлежните. Сето ова предизвикува потсмев кај вработените на скопските клиники.
Од Министерството за здравство не ги потврдуваат овие информации и велат дека ништо не е сигурно, дека работите од час во час се менуваат. Сепак, дел од лекарите, особено професорите, негодуваат на досегашните смени за кои сметаат дека се исклучиво партиски, а не како што најави министерот Таравари според стручност и професионалност. Партиски извори за НОВА, пак велат “каде биле истите тие лекари во изминатите 10 години кога не го кренале својот глас и послушно работеле“.
Како и да е, кои и да се калкулациите, едно е сигурно. Времето одминува, а со него и 100 дена во кои беа најавени првите промени во здравството. Прашање е, како тие ќе се реализираат во вакви услови кога бавно се одвиваат зацртаните цели и нема соработка помеѓу ДУИ и Алијансата на Албанците. Она што е исто така чудно е што се уште нема нов директор на Фондот за здравствено осигурување кој треба да го именува Владата.
.