Обвинителството денеска не побара притвор за лидерот на опозициската СДСМ, Зоран Заев, еден од осомничените во случајот „Пуч“, туку побара судот да му го одземе пасошот и Заев на определено време да се јавува кај надлжен државен орган.
„Со оглед на сите околности на кривично-правниот настан и фактот што кривичното дело останало во обид за осомничениот З.З. не е поднесен предлог за определување на мерката притвор“, се вели во соопштението на Обвинителството.
Сметајќи дека се исполнети законските основи, Обвинителството до надлежниот судија поднесе предлог за притвор за осомничените З.В., С.В., и Б.П.
Лидерот на СДСМ, Зоран Заев, е осомничен во полициска акција „Пуч“заедно со уште три други лица. Првосомничен е ексдиректорот на ДБК, Зоран Верушевски, кого полицијата го терети за шпионажа и за помагање на насилство врз државни функционери.
Заев за „Нова“ изјави дека акцијата „Пуч“ во којашто полицијата го сомничи за наводно недемократско преземање на власта не е ништо друго освен забеган обид на власта да ги спречи таканаречените бомби кои СДСМ ги најавува подолго време.