Добитничка на Нобелова награда за мир рече дека ја посветува наградата на страдалниот народ и претседателот Трамп.
Венецуелската опозициска лидерка Марија Корина Мачадо, која во петокот ја доби Нобеловата награда за мир за 2025 година за борбата против диктатурата во нејзината земја, делумно му ја посвети наградата на американскиот претседател Доналд Трамп, кој постојано повторуваше дека ја заслужува.
О, Боже… Немам зборови, рече Мачадо во телефонски разговор со секретарот на телото што ја доделува наградата, Кристијан Берг Харпвикен. Нејзината реакција беше објавена од Нобеловиот комитет на социјалните мрежи.
„Ви благодарам многу, но се надевам дека разбирате дека ова е цело движење, ова е достигнување на целото општество. Јас сум само една личност. Секако не ја заслужувам“, додаде таа.
Подоцна напиша во објава на платформата X на англиски јазик: „Ја посветувам наградата на страдалниот народ на Венецуела и на претседателот Трамп за неговата решителна поддршка на нашата кауза!“
Белата куќа претходно ја критикуваше одлуката на норвешкиот Нобелов комитет да се фокусира на Венецуела само неколку дена откако Трамп објави напредок во разговорите за прекин на борбите во Газа меѓу Израел и Хамас.
Претседателот Трамп ќе продолжи да склучува мировни договори, да ги прекинува војните и да спасува животи… Нобеловиот комитет докажа дека ја става политиката над мирот, напиша портпаролот на Белата куќа, Стивен Чунг, на платформата X.