Се уште нема услови за олеснување на ковид мерките, дециден е министерот за здравство, Беким Сали.
„Состојбата не е толку позитивна за да можеме да кажеме од денес сме слободни, на една страна се желбите, а на друга реалните бројки кои секојдневно ги добиваме. Ја следиме состојбата не само во државата туку и во регионот. Имаме четири држави кои што ни се репер како први држави кои што ослободија мерки и денес таму забележуваме состојба на бумеранг, враќање на состојба како што беше порано. И ние тука не би сакале да се вратиме на тоа како што било порано“, рече министерот за здравство Беким сали.
Индикаторот за новозаболени и за хоспитализирани е позитивен, вели министерот изразувајќи надеж дека оваа недела земјава ќе влезе во зелената безбедна зона.
„Треба да видиме што ќе одлучиме на Комисијата во среда, во однос на некакво олеснување на мерките“, рече Сали.
Според министерот , серолошката анализа покажала дека 86 проенти од вакцинираните граѓани имаат некаков имунитет на Ковид-19, а 75 проценти од невакцинираните кои прележале имаат некаков имунитет.
Денеска Министерството за здравство прими донација од јапонската влада во медициска опрема вредна 813.000 евра. Опремата е за лекување на пост ковид пациенти, и тоа дефибрилатори, електрокардиограми, ренген апарати, централни монитори, медицински фрижидери и мобилни ехо апарати. Опремата е наменета за Клиника за Инфективни болести, КАРИЛ и ГОБ „8 Септември“.
(Б.Б.)