Главниот уредник и новинарката на НОВА, Борјан Јовановски и Сашка Цветковска, заедно со новинарот Горан Ризаов, се добитници на третата награда „Никола Младенов“ за истражувачка сторија, која ја доделува Македонскиот институт за медиуми, за серијалот истражувања за „Македонски Телеком“, објавени на НОВА.
Третата награда тие ја поделија со Џелал Незири за сторија објавена на Скуп.
Првата награда ја доби тимот на БИРН за истражување „Скопје 2014 под лупа“, како истражување кое од особен интерес за јавноста.
Втората награда и припадна на Билјана Николовска за документарниот филм „Кога здравствениот систем убива дете“, објавен на ТВ Телма.
Прва награда:
– Скопје 2014 под лупа
Втора награда:
– Кога здравствениот систем убива дете
Трета награда:
– Доказите за „Телеком“ под тепихот на обвинителството
– Истрага „Телеком“: Дивидендата под сомнеж дека служела за поткуп
– Истрага „Телеком“: Договорот со Аналитико како „респект“ за ВМРО-ДПМНЕ
– Почеток на крајот – уништување на доказите во случајот Телеком
– Каде завршија останатите 20 милиони евра од аферата „Телеком“
– Властите ги игнорирале барањата за сведоци во аферата „Телеком“
– Афера „Телеком“: Сведоците ги откриваат тајните
– Афера Телеком: “Ненормална ситуација бара ненормална дискреција”
– Во токсичкото кралство на Југохром
Пофалници годинава за истакнат новинарски ангажман при истражувачка сторија добија неколку новинари, меѓу кои Сашка Цветковска, Владо Апостолов, Петар Клинчарски и Сузана Мицева.
Годинешново доделување на наградите беше 15-то по ред, а од 2013 оваа награда го носи името на трагично починатиот истакнат новинар и сопственик на Фокус, Никола Младенов.
Како што информираше жирито, годинава биле пријавени 20 автори со 37 стории, и се забележуваат повеќе стории објавени на онлајн медиумите за разлика од печатените, од каде што конкурирале многу малку новинари.