Советот за безбедност на ОН денеска ја разгледува британската резолуцијата за Сребреница со која се одбележува 20 години од масакарот во Сребреница.
Сепак резолуцијата може да се соочи со вето од Русија, која ги поддржуваше босанските Срби и Србија за време на војните во деведесеттите години на минатиот век.
Нацртот го осудува злосторството во Сребреница и повикува да се направат напори со кои би се спречил геноцид низ светот.
Ако се прифати дека трагичните настани во Сребреница се геноцид, тоа е предуслов за помирувањето, стои во резолуцијата. Во неа се осудуваат и тие што го негираат геноцидот.
По тој повод, српскиот претседател Томислав Николиќ, ја замоли кралицата Елизабета Втора, да побара од британската влада, да се откаже од резолуцијата, и покрај фактот дека таа нема влијание во формирањето на политиките.
Во писмото, кое го објавија српските медиуми, Николиќ бара од кралицата да ги искористи своите надлежности и да ја убеди владата на Камерон да се откаже од неа, тврдејќи дека тоа „би ги отворило старите рани“.
„На нацрт резолуцијата гледам како на нешто штетно за стабилноста во регионот“, вели Николиќ во писмото.
Николиќ во писмото се извинува поради тоа што, обраќајќи ѝ се на кралицата директно, се однесувал „недипломатски“.
Но, Николиќ инсистира дека тоа било потребно, „за да не се направи грешка и да не се врати Балканот назад во тешките времиња на конфликтите“.
Предложената резолуцијата подготвена од постојана членка на Советот за безбедност на ООН Британија го осудува масакрот на повеќе од 7.000 Бошњаци од Сребреница и секое негирање дека е извршен геноцид.
Предлогот предизвика незадоволство во Србија и ентитетот на босанските Срби во Босна и Херцеговина, Република Српска, кои на масакрите извршени од силите на босанските Срби, и покрај пресудите на меѓународните судови, не гледаат како на геноцид.
Николиќ, во своето писмо вели, дека „би била голема неправда, невистинито и неодговорно“, военото злосторство во Сребреница, да се нарече геноцид. Тој ги обвини бошњачките сили за убиство на илјадници српски жени, деца и постари луѓе, во селата во околината на Сребреница за време на војната.