Претседателот Стево Пендаровски денеска ги одликува професорот и нобеловец Пол Кругман и Стопанската комора со Орден за заслуги за Република Северна Македонија, а на нејзиниот претседател Бранко Азески му додели Повелба.
Пол Кругман, нобеловец, истакнат професор по економија и автор и уредник на 27 книги и преку 200 научни статии во стручни списанија, го доби орденот за иновативност, визија и особен придонес во сферата на економијата, преку поставувањето на нов модел на меѓународна трговија, усовојување на нови дисциплини во меѓународната економија, како и за неговата дејност како универзитетски професор и објавувањето на голем број значајни научни дела и трудови.
Кругман се зблагодари на довербата и доделениот орден и нагласи дека Северна Македонија е модел на демократија и мир во тешки времиња. Порача дека ова се времиња кога земјите треба да застанат зад вредностите во кои сите веруваат и да соработуваат меѓу себе.
Орденот за Стопанската комора на Македонија, пак, е за нејзиниот 100-годишен посветен влог и траен придонес во развојот на стопанството и поврзувањето на различни еснафски стопанственички структури, со што, според образложението, се обезбеди сигурна основа за постојано подобрување и развој на условите на стопанисување и конкурентност на пазарот, како темел за стабилност и економски просперитет на државата.