НоваТВ дознава дека приведениот за опожарувањето на бугарскиот културен центар „Иван Михаилов“ во Битола, е пејачот Ламбе Алабакоски, кој е приведен и го признал делото.
Претходно министерот за внатрешни работи Оливер Спасовски, кусо на социјалните мрежи, објави дека е фатен сторителот, без да го наведе неговото име и презиме туку само иницијалите А.Л. По Спасовски и МВР излезе со соопштение во кое ја потврди веста, во кое се наведени истите податоци како и во објавата на министерот.
„Се работеше деноноќно да се изнајде сторителот, се земаа предвид сите докази, а по извршените службени разговори во изминатите денови, вчеравечер, со судска наредба, беше извршен претрес на две локации кои ги користи Л.А.(34) од Битола, при што се пронајдени и одземени предмети поврзани со кривичното дело, по што лицето е лишено од слобода. Уште еднаш покажавме дека единствената моќ што ја има секоја правна држава е моќта да го сузбие криминалот. И во овој сегмент нема „пардон“, нема заштитени лица – сите се еднакви пред лицето на законот, а секој којшто се огрешил – мора да одговара“, порача пред малку министерот за внатрешни работи Оливер Спасовски соопштувајќи дека е фатен подметнувачот на пожарот во бугарскиот културен центар „Иван Михаилов“ во Битола.
Пожарот беше подметнат во петокот спрема саботата минатиот викенд, и се совпадна со доаѓањето на шефицата на бугарската дипломатија во Македонија, Теодора Генчовска. На безбедносни камери се гледало како човек на велосипед, со качулка на лицето, доаѓа пред влезната врата на објектот и истура запалива течност, ја пали по што избувнува голем пожар и тој исплашен бега.
Веста за опожарувањето на бугарскиот културен центар во Македонија набрзо се најде на ударно место во сите медиуми овде и во Бугарија, а за настанот станало збор и во телефонскиот разговор меѓу бугарскиот претседател Румен Радев и помошничката заменик државен секретар на САД, Карен Донфрид. (С.К.)