Околностите што му претходеа на исчезнувањето на 27- годишниот Матеј Периш, изјавата на лицата кои пред исчезнувањето биле во негово друштво, со извршените проверки и обдукцискиот наод, не укажуваат дека неговата смрт е поврзана со некаков вид на насилство.
Имено, во обдукцијата што ја изврши Институтот за судска медицина по наредба на Вишото јавно обвинителство во Белград, констатирано е дека на телото на Матеј Периш нема повреди на коските на главата, вратот, трупот или екстремитетите.
Истовремено, резултатите од токсиколошките анализи покажаа присуство на токсични концентрации на амфетамини во крвта и органите, во присуство на етил алкохол. Исто така, во примерокот од косата се откриени траги од кокаин и бензоилекгонин, соопшти Вишото обвинителство.
Комисиското вештачење го извршија тројца вештаци, специјалисти по судска медицина, јавуваат српските медиуми.
Откако Вишото јавно обвинителство ги објави резултатите од токсиколошките анализи на телото на Матеј Периш, се огласи и неговиот татко Ненад Периш.
Жал ми е што камерите не работеа, а Матеј ја однесе тајната во гроб. Не знам што се случи во „Готика“ , не знам зошто се дрогирал, зошто излезе и трчаше. Мислам дека тоа беше несреќен случај, изјавил таткото на Матеј, Ненад Периш, пренесуваат српските медиуми.