Соња Крамарска
Европа и светот се разбудија во нова реалност-закана од нуклеарна војна. Војна во која Путин нема да ја жртвува само Европа со своите налудничави планови туку и Русија. Развојот на војната оди во несакан правец, а стравувањата од глобална катастрофа растат со секој нов ден.
Колку е реална таа закана и што тоа значи и за Северна Македонија, консултираме експерт по војување од македонското Министерство за одбрана. Според експертот, кој сака да остане анонимен заради чувствителноста на темата, на нуклеарната закана на Путин треба да се гледа на повеќе нивоа, и тоа политичко, тактичко и оперативно.
Политичкото е колку е тој подготвен да ризикува дома и надвор, тактичко е дали намерите му се да прати порака до САД, НАТО и ЕУ да ги запрат санкциите, а оперативно е да го скрши отпорот на Украина и на претседателот Зеленски и поддршката што ја добиваат од демократскиот свет. Нашиот извор смета дека нуклеарен напад не треба да се исклучи бидејќи рускиот лидер со секој нов ден го губи легитимитетот и демонстрира нервоза во постапките. “Изминатите неколку дена покажаа дека тој не може да ги оствари своите планови за брзо освојување на Украина и тоа го прави опасен”, смета изворот.
Поконкретен во своите процени е генералот Горанчо Котески, поранешен началник на Генералштабот на Армијата, кој вели дека опасноста е реална и тоа повеќе за европската и светската безбедност бидејќи ако Путин реши да ја оствари заканата негова цел нема да биде Украина затоа што истрелување на нуклеарни ракети ќе ја загрози и Русија поради близината со Украина. “Затоа тој го употреби терминот „одвраќање“ а не „напад“ односно вели дека ги става во борбена готовност во случај да треба да се брани”, вели Котески. Меѓутоа, тој додава постои и т.н. тактичко – нуклеарно оружје кое се користи на оддалеченост од 5-6 километри и се исфрла од обични топови или минофрлачи и кое може да биде употребено во радиусот на кризното жариште , без да биде загрозена Русија, што ја прави опасноста од нуклеаран напад реална.
Тој појаснува дека употребата на нуклеарно оружје би било катастрофа за целиот свет и дека ќе води кон војна со несогледливи последици во идните сто години поради дејствијата што ги предизвикува нуклеарното оружје а тоа се разорни, ударни, топлотни и секако радијацијата.
Околу можноста врз Путин да се изврши притисок да се откаже од “бомбастичната” реторика, американски “Политико” потсетува дека Русија и САД во 2015 година при сириската криза воспоставиле модел на “деконфликтизација” кој подразбира директен контакт меѓу воените врвови на двете држави заради појаснување на реториката.
“Со две потенцијални нуклеарни сили на блиска географска оддалеченост, реален е потенцијалниот воен конфликт од пошироки размери и затоа е потребна итна деескалација”, анализира “Политико” наведувјќи дека директната телефонска линија меѓу Вашингтон и Москва постои уште од кубанската криза во 1963 година кога беа близу до нуклеарна војна. Но според изворите на порталот во Пентагон, комуникацијата овие денови е замрена.