Во паркот „Жена борец“, пред Споменикот на децата бегалци во Скопје, денеска беа одбележани 72 години од завршувањето на Граѓанската војна во Грција. Во организација на „Републичкото здружение на децата бегалци и нивните потомци од Егејскиот дел на Македонија – Т га за југ“ им беше оддадена почит на загинатите борци кои го дадоа својот живот и се одбележаа 35 години од формирањето на ова здружение.
На одбележувањето присуствуваа градоначалниците на Град Скопје и на општина Центар Петре Шилегов и Саша Богдановиќ, советникот во Владата Милан Живковиќ, ченови на Здружението од сите градови, ученици од основните училишта.
Шилегов истакна дека е многу важно да учиме од нашата историја и порача да се чува ова дело.
– Да не дозвилиме децата да ја имаат судбината на нашите дедовци. Затоа секогаш треба да бидеме посветени, со сериозни анализи, опфати и планирања кои се потезите кои ги влечеме во македонската политика. Во Град Скопје креираме политики каде секој човек ни е важен и креираме политики да бидат инклузивни граѓаните. Секогаш да имаме подадена рака и таа секогаш да биде полна со луѓе затоа што само со луѓето можеш да живееш, изјави Шилегов. Додаде дека ќе остават здрава држава и здрав град.
Градоначалникот Богдановиќ порача да се градат мостови и пријателства за да не се повторуваат настани како што се случувале во минатото.
Настапија и наградените ученици, добитници на специјалната награда „Ѓорги Доневски“. Наградата го носи името на Доневски, кој е еден од иницијаторите да се формира здружението и да се направи Споменикот на децата бегалци во 1988 година. Во негова чест и за да не се заборави културата, уметноста, историјата и голготата на еден народ, во март годинава Здружението распиша конкурс за сите основни училишта. Децата глумеа, пееја, цртаа и пишуваа, а наградените ученици ќе добијат таблети.
Присутните положија цвеќе пред Споменикот на децата бегалци. За него со години се грижеше Здружението на децата бегалци од Скопје, а од денеска грижата за споменикот ја преземаат Град Скопје и Општина Центар.