Република Северна Македонија и Република Србија имаат пријателски и партнерски односи со тенденција на зацврстување на соработката и јакнење на довербата, изјави министерот за надворешни работи Бујар Османи на заедничката прес конференција со министерот за надворешни работи на Република Србија Никола Селаковиќ , кој е во возвратна официјална посета на земјава.
И двајцата министри информираа дека воделе отворен и конструктивен разговор со цел да се проверат областите во кои си задале задача да ја унапредат соработката при ланската посета на Османи на Белград, колку од договореното е реализирано. И Османи и Селаковиќ видно задоволни ги презентираа резултатите од економската соработка. Османи рече дека по Германија и Велика Британија, Србија е наш трет економски партнер со трговска размена која минатата година достигнала над милијарда евра. Селаковиќ, износот од 1 милијарда и 150 милиони евра, го нарече историски но нагласи дека минатата година увозот на стоки од Македонија во Србија бил зголемен за 40 проценти, а дека севкупно економската соработка дошла до нивото од пред пандемијата. Очекувањата се со заживувањето на Отворен Балкан овие параметри да се зголемат.
„ Иницијативата Отворен Балкан е шанса на тој начин да се зголеми економската размена. Нашата иницијатива е инклузивна и сакаме во таа рамка да го видиме целиот Западен Балкан и кога ќе бидеме во прилика да видиме да дава резултати очекувам да ни се придружат и сите“, изјави Селаковиќ.
Двајцата министри воспоставија основа за развој на културната соработка со денеска потпишаната Спогодба за основање на културно-информативни центри во Скопје и Белград.
Османи истакна дека го охрабрил Селаковиќ за дијалогот Белград – Приштина што се води со посредство на ЕУ во врска со што Селаковиќ рече:
„Говоревме и за важните регионални прашања, за дијалогот помеѓу Белград и Приштина, го изнесовме тоа што се наши ставови. Посветени сме на дијалогот, како единствено прифатливо решение за кое било политичко прашање што постои. Нашата посветеност на дијалогот нема да се доведува во прашање“ изјави српскиот министер.
Селаковиќ во контекст на нашите ЕУ-интеграции понуди помош и ја реафирмира српската позиција за неодложен почеток на преговорите со ЕУ.
Селаковиќ во Скопје ќе има одвоени разговори со претседателот Стево Пендаровски, со претседателот на Собранието Талат Џафери како и со премиерот Димитар Ковачевски.
(М.Т.)