На законот за организација и работа на органите на државната управа (ЗОРОДУ) со кој се отвори пат кон трансформација на ресорите во идната Влада која наместо досегашните 16 ќе има 20 министерства, остро се спротивстави граѓанскиот сектор и опозицискта СДСМ.
Платформата на граѓански организации за борба против корупцијата реагира за затворениот и неконсултатитвен процес со засегнатите страни по измената и дополнувањето на Законот за организација на работата на органите на државна управа.
– Формирањето на три нови министерства и реорганизацијата на системот на државната управа без претходна длабинска анализа за оправданоста на предлогот е неприфатливо за Платформата на граѓански организации за борба против корупција. Укажуваме дека ова влијае негативно врз соработката и довербата на граѓанското општество со креаторите на јавните политики, велат од Платформата во писмената реакција.
Реорганизацијата на државната управа е исклучително важен процес кој, како што потенцираат од Платформата, мора да почива врз принципите на транспарентност, вклученост и претходна подготовка на граѓаните за системските промени што се иницираат.
Жестоки критики и на сметка на законот и на процедурата за носење на законот имаше од опозициската СДСМ. За опозицијата реорганизацијата на Владата и воведувањето на четири нови министерства е дополнителен трошок и отвора пат кон нови партиски вработувања што според нив е единствената цел на владејачкото мнозинство.
Претседателот на СДСМ во заминување и актуелен пратеник, Димитар Ковачевски изјави дека предизборното ветување на ВМРО-ДПМНЕ и коалицијата беше намалување на бројот на министерствата.
– Се прави површно и паушално. Ваков сложен, системски закон кој треба да се носи во редовна постапка, со анализи, со проценка на ефектите, од финансиски и кадровски аспект, сега се носи по скратена постапка, без соодветните анализи за што реагираа и невладини организации и без буџетски импликации, рече Ковачевски.
Според него законот не допира неколку важни прашања кои се однесуваат на оваа сфера.
– Организацискиот систем, што овој закон не ги третира институциите формирани со посебни закони, не го олеснува буџетирањето туку напротив, го прави посложено со нови 4 министерства. Не се унапредуваат линиите на отчетност, нема критериуми, а наместо да се намали се зголемува бројот на државната управа. Не се опфатени функциите на вклучените министерствата и нивна рационализација. Воопшто не се водело ниту сметка за поставеноста на Европска унија, затоа што вака нема да ја олесни работата со европските институции. Значи нема да се постигнат основните цели со еден ваков закон, вели Ковачевски.
Измените предвидуваат на Министерството за економија да се додаде сегментот труд, а досегашното Министерството за труд и социјална политика ќе биде министерство за социјална политика, демографија и млади. Министерство за спорт ќе ја наследи Агенцијата за млади и спорт, а дел од надлежностите на Министерството за економија во делот на рударството и енергетиката ќе бидат дел од надлежностите на ново Министерство за енергетика, рударство и минерални суровини.
Ингеренциите за туризмот ќе ги има ново Министерството за култура и туризам, ќе се формира Министерство за дигитализација кое ќе го наследи досегашното Министерство за информатичка технологија и администрација и ќе се формира Министерство за администрација.
Со овој број на министерства, Северна Македонија станува земја со најмногу министерства во регионот. Словенија, која е многу поразвиена земја од нас, има 16, Хрватска има 11 министерства, додека Албанија има 16 министерства.
Дестан Јонузи / Фронтлајн