Македонско-бугарскиот спор е очигледно сензитивна тема во двете општества и побудува голем интерес, многу емоции и различни интерпретации, но она за што деновиве се крева многу прашина во двете земји, всушност е португалскиот предлог кој сè уште е основа за постигнување на договор, појасни министерот за надворешни работи, Бујар Османи.
„Јас сум во комуникација со министерката, еве и денеска имавме можност да разговараме и со премиерот. Тоа што јас зборувам за документ е всушност е португалскиот предлог кој сè уште е основа за постигнување на договор и кој што е претставен во различни форми, нон пејпери, текстови, разменети идеи во текот на овој период. Сметам дека тој предлог останува сржта за изнаоѓање на решение што е прифатливо за двете страни. Мислам дека вчерашниот коментар на бугарското Министерство за надворешни работи се однесуваше на одговорите на т.н. пакет „5+1“ кои беа предадени, односно претставени уште во Рига во минатата година“, вели шефот на македонската дипломатија.
Но, тие прашања, вели тој, се помалку важни. Османи ја нагласи важноста за продолжување на комуникацијата, бидејќи, како што рече, „оваа тема очигледно предизвикува доста различни ставови и во Бугарија, па и во рамки на коалицијата“.
„Нашите позиции се јасни. Ние се движиме во рамки на позициите што ни ги наметна парламентот. Сметаме дека предлогот на меѓународната заедница е единствениот официјален предлог на Европската Унија, претставена преку, тогаш, португалското претседателство. Тој документ, односно португалскиот предлог кој ние сме го прифатиле, останува и сметаме дека треба да биде основа за решение“, порача Османи.
Министерот потенцира дека овие чести средби, и покрај сите разлики, само можат да ја подобрат таа динамика за изнаоѓање на взаемно прифатливо решение и одблокирање на евроинтегративниот процес на земјава.
„Очигледно е дека имаме разлики, имаат разлики и партиите внатре во Бугарија, имаат и нашите овде. Не е лесно прашање, комплексно прашање е. Меѓутоа, ние, како политичари, сме должни да испорачаме европска перспектива на граѓаните, притоа штитејќи ги нашите интереси. Покажавме дека можеме да штитиме нашите интереси, инаку многу поодамна ќе имавме решение. Но, никогаш не се откажавме од наметнување на притисок, бидејќи европската перспектива е наш важен стратешки процес“, заклучи Османи по денешната посета на трансформаторската станица „Битола 2“ и презентација на далеководот „Битола – Елбасан“ во придружба на неговата бугарска колешка Теодора Генчовска и бугарскиот премиер, Кирил Петков.