Децата во основните училишта нема да носат заштитни маски, потврдија од Комисијата за заразни болести.
Членовите на Комисијата за заразни болести на денешниот редовен состанок донесе одлука да препорачаат да се тргнат маските за децата од основните училишта.
„Ги ослободуваме од обврската да носат маски учениците во основно образование, но ова нема да важи за наставниците и техничкиот персонал“, вели претседателот на Комисијата, доктор Александар Петличковски, кој признава дека имало дискусија на оваа тема помеѓу членовите на Комисијата но сепак конечната одлука била донесена со мнозинство.
Од Комисијата велат дека внимателно ќе ги следат сите параметри околу епидемиолошката состојба во училиштата.
„Доколку има било какво влошување на епидемиолошката состојба или зголемување на епидемиолошкиот ризик тогаш може повтрно да се вратат на сила истите мерки кои што беа и претходно. Но, на ваков начин на постепено олеснување на согласно епидемиолошкиот ризик, сметаме дека можеме да на некој начин не се доведеме во ситуација како во Германија, Австрија, Велика Британија и Данска каде што имаше нагло зголемување на бројот на новозаразени, на хоспитализации и на починати“, вели портпаролот на Комисијата, доктор Злате Мехмедовиќ.
Сепак, останува избор на родителите и на децата доколку сакаат можат да носат заштитни маски додека се на настава.
Втората одлука на Комисијата е да препорача зголемување на капацитетот на исполнетост на затворени објекти, како опери и театри, од досегашните 50 на 75 отсто исполнетост.
Исто така, Комисијата ќе препорача да не се бараат сертификати за вакцинација или прележаност за оние гости кои ќе ги користат само отворените тераси на угостителските објекти.
Овие препоораки ќе бидат предложени до Главниот кризен штаб на Владата.
Извори во Комисијата за НоваТВ потврдија дека имало жестока дебата околу првата точка за укинување на заштитните маски во училиштата и дека првично се разговарало тоа да важи само за учениците до осмо одделение.
(Б.Б.)