Седумнаесет од нив биле во критична состојба и се на интензивна нега.
Осум лица починаа откако пиеле домашен алкохол во иранскиот град Бандар Абас, јавија локалните медиуми.
Други 51 лице завршија во болница поради труење со алкохол, a 17 од нив биле во критична состојба и се на интензивна нега, информираше д-р Фатемех Новрузијан за време на прес-конференција.
Полицијата соопшти за апсење на осуммина под сомнение за производство и дистрибуција на алкохол.
Производство, продажба, како и конзумирање на алкохол, е строго забрането во Исламската Република, со исклучоци за одредени верски малцинства.
Казната за консумирање алкохол од страна на муслиман е 80 удари со камшик.
Официјалните лица во Бандар Абас не ја идентификувале токсичната супстанција што била во домашно правениот алкохол.
На почетокот на пандемијата од Ковид-19, лажно верување дека пиење или плакнење на устата со алкохол ќе го спречи коронавирусот, предизвика зголемен број труења со метанол во Иран.