Собраниската надзорна комисија која треба да ја следи работата на новоформираната Агенција за следење на комуникациите ОТА, три месеци нема добиено пари за да ангажира пари за експерти.
Претседателот на Комисијата Емил Димитриев кажа дека писмено побарал од раководните лица на Собранието уште во ноември да се обезбеди буџет и да почне постапка за ангажирање експерти.
„Во ноември доставив писмо до Џафери дека е неопходно Собранието да помогне во делот на обезбедување буџет и спроведување на постапката за огласување за избор на експерти, бидејќи Комисијата нема ресурси тоа да го направи, но се уште немам одговор“ рече Димитриев.
Годишно, за експертите се планира буџет од 20 000 евра. Комисијата ќе треба да ангажира експерти од дигиталната форензика, телекомуникации и веројатно експерт од областа на правото. Планот е да се ангажираат 12 експерти, а по двајца од нив да ја посетуваат Агенцијата во шестте годишни контроли.
На средбата која ја имал со европските експерти од ЕУ и ЕК Димитриве кажа дека било заклучено дека доцни граѓанската контрола врз работат на ОТА која требаше да профункционира со формирањето на Агенцијата – уште во ноември лани.
Доцни и екипирањето на Граѓанскиот совет кој исто така треба го контролира работењето на ОТА. Избрани се четворица членови, а за другите тројца допрва ќе се објавува втор оглас. Професорот Гордан Калајџиев кој е избран за член на овој Совет вели дека иако граѓанскиот сектор се залагал да добие поголеми надлежности, останал со помали овластувања од оние што ги има собраниската комисија.
Калајџиев додава дека тие како граѓански совет можат да побараат проверка на работата на Агенцијата и дали биле следени и телефонски броеви без судска наредба само во изминатите три месеци.
Калaјџиев очекува со граѓанскиот надзор да се сведе на минимум злоупотребата на тајните служби, но напоменува дека и натаму има начини како прислушувањето да продолжи.
„ Лизгав терен има и натаму. Законите дозволуваат прислушување и со технички средства надвор од ОТА“ вели Калајџиев.
Граѓанскиот совет може по сопствена иницијатива или по претставка на граѓанин да изврши контрола врз работата на ОТА. Освен овој совет, контрoла врз следењето на комуникациите може да врши и Народниот правобранител и претставници на Дирекција за заштита на лични податоци.
„ На ОТА и се потребни овие тела. Тие треба во полн капацитет да си ја завршат работата. Само така ОТА може да стекне доверба. Можам јас да се појавувам во јавноста и да тврдам дека се е во ред, но тоа треба да се потврди со граѓанска, експертска контрола“ вели директорот на ОТА Зоран Ангеловски.