Патот кон Европската Унија е отворен за Северна Македонија, само треба како држава да ги спроведуваме нашите обврски од целиот пакет и од Протоколот којшто беше потпишан во Софија, изјави вицепремиерот задолжен за европски прашања Бојан Маричиќ.
„Со одржавање на првата Меѓувладина конференција и првата сесија на скринингот, на земјата ѝ се отвора еден пат за движење, на чекорење напред“, нагласи Маричиќ во вечерашното издание на емисијата „Трилинг“ на ТВ24.
Во врска со унилатералната изјава за јазикот, Маричиќ истакна дека и земјава и Бугарија дале унилатерални изјави, кои немаат никаква важност за целокупното користење на македонскиот јазик во Европската Унија, ниту пак за ставот на другите држави членки.
„Тоа значи само дека Софија изразува свој став како што има изразено и во Обединетите Нации кога нѝ беше впишан македонскиот јазик. Ние го изразивме нашиот став и тоа прашање не очекуваме да се споменува понатаму. Во наредните денови очекуваме да го потпишеме договорот за ФРОНТЕКС со македонски јазик, каде што и Бугарија ќе го потпише како една од државите членки и сметаме дека за нас ова прашање е затворено“, рече Маричиќ, потенцирајќи дека не очекува ова прашање понатаму да се отвора.