Регулаторната комисија за енергетика (РКЕ) донесе одлука за престанок на лиценцата за вршење на енергетската дејност и вршење на производство на топлинска енергија на компанијата БЕГ производство, соопшти претседателот на РКЕ, Марко Бислимовски.
Тој додаде дека за одлуката на РКЕ ќе биде запозната и Владата која со соработката со Министерството за економија е должна да организира тендер, односно јавен повик за избор на нов вршител за вршење на енергетска дејност – производство на топлинска енергија.
„Сите овие рокови за организирање на јавниот повик очекувам да бидат кратки во наредниот период, со цел да завршат навремено и да се избере нов вршител на енергетската дејност – производство на топлинска енергија“, нагласи Бислимовски.
Првиот човек на РКЕ нагласи дека во изминатиот период повеќе пати било комуницирано со БЕГ производство.
„Знаете дека одреден период имавме одредени несогласувања, а потоа со добивањето на позајмицата од Владата од околу шест милиони евра, снабдувањето со топлинска енергија во градот Скопје во целост се стабилизираше. Потоа, БЕГ производство, за својата лиценца, сметаа дека повеќе нема да можат да ја вршат оваа дејност со соодветен квалитет и поради тоа Регулаторната комисија за енергетика донесе одлука за престанување на таа лиценца. Дополнително, во петокот, добивме две исти такви барања и за БЕГ дистрибуција и за БЕГ снабдување. Овие три компании кои произлегуваа од БЕГ ја вршеа оваа дејност во изминатите 9-10 години и во најголем дел ги исполнија своите обврски од лиценците. Но, дојде време кога сметаа дека не можат повеќе да дадат квалитет на испорака на топлинска енергија на соодветно ниво што е пропишано со правилата за снабдување“, потенцира Бислимовски.
С.Д.