Резултатскиот подем на македонската фудбалска репрезентација во квалификациите за СП 2022 во Катар, победата над Германија, елиминацијата на Италија и мечот со Португалија, го привлекоа вниманието на медиумите ширум Европа. „Франкфуртер алгемајне цајтунг“ го искористи поводот за интервју со Дарко Панчев, македонската фудбалска легенда кој во изминатите 20-тина години честопати беше споредуван со Горан Пандев, долгогодишниот капитен и лидер на националниот тим кој се повлече по Европското првенство лани.
„Не може да се заборави дека тој го даде голот против Грузија во Тбилиси за пласман на Европското првенство. Неговиот придонес за Македонија е неспорен, но не може да се заборави дека Македонија со Пандев губеше и од Андора“, вели Панчев меѓу другото во интервјуто за „Франкфуртер алгемајне цајтунг“.
Панчев потоа се осврна и на актуелниот ростер на националниот тим. Верува на уште поголем развој на играчите како Барди, Алиоски, Елмас што ќе оди во прилог на идните предизвици на репрезентацијата.
Популарниот Кобра смета дека победите над Германија и Италија, средини во кои мина дел од кариерата, се неспоредливи.
„Првата беше во квалификациска група, втората беше во бараж. Но, сеедно, и двете се голем белег и претставуваат пресвртница за македонскиот репрезентативен фудбал“, истакна Панчев.
Тој смета дека Фудбалската федерација на Македонија (ФФМ) не треба да губи време и на актуелниот селектор Благоја Милевски веднаш да му понуди нови договор. Тоа би го сторил и самиот доколку би бил на чело нан ФФМ.
„Јас да сум претседател на ФФМ, веднаш би го продолжил договорот со Милевски. Импресиониран сум од неговата работа, од неговиот концепт, бидејќи и претходно, со младата репрезентација, имаше одлични резултати. Тој за мене е најдобриот селектор што досега го имача фудбалската репрезентација“, истакна Панчев за „Франкфуртер алгемајне цајтунг“.