Партиски членови среде кампања „ажурираат“ податоци на оштетени од поплави

Партиски активисти вчера напладне собираа податоци од граѓаните во општина Василево кои беа оштетени за време на поплавите минатата година. Екипата на НОВА беше на лице место во селото Пиперово каде што ги затекна двајцата членови на месни комитети на ВМРО ДПМНЕ заедно со жена која одби да се претстави, но која според кажувањата на присутните, рекла дека е член на државна второстепена комисија која одлучувала по поплаките од општинските проценки за утврдување на штетите од ланските поплави во струмичко. Тие собираа лични податоци од граѓаните и имотни листови, со цел, како што им било кажано „да се утврди зошто не им е исплатена штетата“.

Оштетените жители кои чекаа на ред да влезат внатре кажаа дека се дојдени за штетите од ланските поплави.

„На мене ми кажаа дека се има направено некаква грешка и дека треба да се исправи, но за тоа ќе биде потребно време за да се внесе компјутерски, изјави еден од оштетените жители на Пиперево.

Иако на почетокот слободно влеговме во просторијата каде што се собираа податоците, штом се претставивме дека сме новинари присутните „попишувачи’ не избркаа. Тие одбија да одговорат што прават во Пиперово и за која цел се собираат податоците. Се обидовме да добиеме одговори и од општината Василево. Прашавме зошто партиски членови, наместо општинска или државна администрација учествуваат во собирањето податоци, за која цел се собираат и дали станува збор за злоупотреба на државните ресурси во партиски цели.

двајцата членови на ВМРО ДПМНЕ со анонимната жена од Скопје


Граѓани чекаат ред со надеж дека поплаките ќе им бидат уважени, а штетите од поплавите надоместени

Телефонски ни беше речено дека не можат да ни одговорат без одобрување од градоначалникот кој во моментот бил на состанок. Ниту подоцна во текот на денот не добивме одговор.

НОВА го провери идентитетот на лицата кои собираа податоци заедно со анонимната жена и откри дека не се вработени во општината, туку се самостојни земјоделци. Едниот од нив е Илчо Иванов, претседател на месниот комитет на селото Пиперово на ВМРО ДПМНЕ, додека другиот е Наце Коцев, член на истиот месен комитет на партијата.

Минатата година од поплавите струмичкиот регион претрпе штети од 4.3 милиони евра. Тогаш се формираа комисии за утврдување и проценка на штетите во самите општини (општина Струмица и општина Василево). Незадоволните оштетени граѓани чии пријави не беа прифатени подоцна се жалеа во владината второстепена комисија.