Законите не важат во руралните средини и помалите населени места за оние кои ја имат власта во свои раце, овој впечаток се стекна од реакциите на опозициските советници во општинта Василево кои чиј Совет денес расправаше.
Сторијата која ја објави НОВА за случајот со дипломираниот музичар Оливер Гичев, кој работи две години како педагог во едно од општинските училишта и покрај тоа што државниот образовен инспекторат наложил да се поништи одлуката за неговото вработување поради неисполнување на критериумите беше тема на денешната седница на Советот.
Наместо да др поништи огласот советничката група на ВМРО-ДПМНЕ денеска на седница го одобри полугодишниот извештај за училиштето и покрај забелешките на опозицијата за катастрофалниот среден успех и кршењето на законот од страна на директорката Соња Ничева.
На прашањата од страна на советниците од СДСМ упатени кон директорката Ничева зошто Оливер Гичев сеуште работи како педагог и зошто не се почитува одлуката на Државниот инспекторат, таа одговори дека според систематизацијата на училиштето тој ги исполнува условите.
Тема на денешната средба на советниците беше и економскиот развој на општината за кој опозициските советниците на СДСМ обвинија дека е катастрофален, а тоа го потенцираа преку годишниот извештај за 2013 година. Тие денеска обвинија дека секој жител на општина Василево должи по 100 евра благодарение на неуспешната економска политика на владејачката ВМРО-ДПМНЕ и градоначалникот.
„Општина Василево во 2013 година се задолжила со нови 20 милиони денари и ако на тие се додадат и кредитите од претходно, општината е должна 50 милиони денари или секој граѓанин должи по 100 евра ни крив ни должен само заради лошите политики на градоначалникот и на ВМРО-ДПМНЕ“, обвини Џоко Христов, советник на СДСМ. Од советничката група на ВМРО-ДПМНЕ велат дека ваквите изјави на советниците од СДСМ биле редовна практика заради добивање на популарност во јавноста.
„Советничката група на СДСМ сака да направи некаква тензија во однос на задолжувањата. Да ние не криеме дека се задолжуваме. Но тоа кредитно задолжување се однесува на капитални расходи во најголем дел на изградба на водоснабдителен систем на населено место, каде што досега немаше водоснабдување и чиста вода за пиење, истакна Дејан Ефтимов, советник од ВМРО-ДПМНЕ.
Во Годишниот извештај за 2013 кој беше усвоен пак стои дека токму најслабиот процент на реализација се капиталните приходи со само 9 проценти, или вкупна реализација од планираните приходи во основниот буџет од 43 проценти. Од ваквите проценти може да се заклучи дека реализацијата на приходите воглавно не се одвиваше со предвидената динамика и можеме да кажеме дека изминатата година ја завршивме неуспешно, се наведува во извештајот.