Одлуката за прифаќање на модификуваниот француски предлог нема да биде ниту историски триумф, како што би сакале да кажат од едниот камп, ниту ќе биде историски неуспех или дебакл, како што велат оние од другиот камп, изјави претседателот Стево Пендаровски по состанокот на Советот за безбедност во Вила „Водно“.
„Според мене, станува збор за транзиционен компромис за една од фазите на европските интеграции во која се важни три елементи и затоа предлогот, според мене, во овој формат, во оваа фаза е прифатлив. Прво, со предлогот ја креваме бугарската блокада, која трае повеќе од две години, и дозволува формално отворање на преговорите по 17 години чекање. Второ, овозможува скрининг процес што е задолжителна фаза пред преговорите за кластерите. И трето, што е апсолутно најважно, не само за мене, туку за секој од нас, ама баш со ништо не го поткопува македонскиот идентитет, затоа што за клучната, темелната одредница на тој идентитет, за македонскиот јазик во предлогот има чиста формулација, без фусноти“, изјави Пендаровски во образложението на неговиот став.
Пендаровски објасни и зошто предлогот го нарекува транзиционен компромис.
„Затоа што го решава актуелниот проблем, актуелнава блокада, но во себе им предвидено дефакто нова блокада која овојпат може да биде и најверојатно ќе биде наша, домашна. Знаејќи на внатрешната политичка констелација, потребниот праг за уставни промени од две третини во овој момент изгледа сосем недостижен. Во тој услов е содржан и најголемиот парадокс на предлогот. Имено, никој во принцип тука, дома кај, нас, нема против влезот на Бугарите во Уставот, но внатрешната поларизација го оневозможува консензусот по тоа прашање“, истакна македонскиот претседател.
Условот, според него, претствува и најголема слабост на предлогот, иако уставните измени ќе дојдат на дневен ред по скринингот или според некои експертски проценки, дури на почетокот на 2024 година.
С.Д.